தமிழக அரசியல்: மக்கள் தீர்ப்பை மதிக்கும் மாண்பு – கமல்ஹாசனின் பார்வை!

மக்கள் தீர்ப்பை மதிக்க வேண்டுமா? கமல்ஹாசன் கேள்வி

தமிழக சட்டமன்றத் தேர்தல் முடிவுகள் வெளியாகி, தமிழக அரசியல் களம் சூடுபிடித்துள்ளது. எந்த ஒரு கட்சிக்கும் தனிப்பெரும்பான்மை கிடைக்காத சூழலில், தனிப்பெரும் கட்சியாக உருவெடுத்துள்ள தமிழக வெற்றி கழகத்தை ஆட்சி அமைக்க ஆளுநர் அழைக்காதது பெரும் விவாதப் பொருளாகியுள்ளது.

இந்நிலையில், மக்கள் நீதி மய்யத்தின் தலைவர் கமல்ஹாசன், தனது சமூக வலைதளப் பக்கத்தில் இதுகுறித்த தனது ஆழமான கருத்துக்களைப் பதிவிட்டுள்ளார். அவரது இந்த அரசியல் பார்வை, ஜனநாயகத்தின் நெறிமுறைகளையும், மக்கள் தீர்ப்பின் மாண்பையும் அழுத்தமாக எடுத்துரைக்கிறது.

கமல்ஹாசன் தனது பதிவில்,

 "தமிழ்நாடு சட்டமன்றத் தேர்தலில், தனித்து ஆட்சி அமைக்கும் அதிகாரத்தை மக்கள் எந்தக் கட்சிக்கும் வழங்கவில்லை. இந்த முடிவு தமிழ்நாட்டு வரலாற்றில் முன் எப்போதும் நிகழாத ஒன்று" 

என்று குறிப்பிட்டு, மக்கள் தீர்ப்பின் தனித்தன்மையை சுட்டிக்காட்டியுள்ளார்.

முன்னதாக, திமுக தலைவர் மு.க. ஸ்டாலின் அவர்கள், "மக்கள் தீர்ப்பை மதிக்கிறோம். பொறுப்பான எதிர்க்கட்சியாக செயல்படுவோம்" என்று அறிவித்திருந்ததை, கமல்ஹாசன் மனதார பாராட்டியுள்ளார். ஸ்டாலினின் இந்த அரசியல் முதிர்ச்சியை தான் மதிப்பதாகவும் அவர் தெரிவித்துள்ளார்.

விஜய் – 108 இடங்கள்: ஏன் அழைப்பு இல்லை? 

தொடர்ந்து, "திரு. விஜய் தலைமையிலான தமிழக வெற்றி கழகம் 108 இடங்களில் வென்றுள்ளது. அவரை ஆட்சி அமைக்க அழைக்காமல் இருப்பது, தமிழ்நாட்டு மக்களுடைய ஆணையை அவமதிப்பதாகும்" என்று அவர் கூறியுள்ளார். மேலும், தேர்ந்தெடுக்கப்பட்ட 108 உறுப்பினர்கள் இன்னும் பதவியேற்க முடியாமல் இருப்பது மாநிலத்திற்கு நேரக்கூடிய அவமானம் என்றும், மக்களாட்சிக்கு ஏற்படக்கூடிய சேதம் என்றும் அவர் கவலை தெரிவித்துள்ளார். இது வெறும் அரசியல் சார்ந்த பேச்சு அல்ல, மாறாக ஒரு இந்தியக் குடிமகனின் கொள்கை குரல் என்பதை அவர் தெளிவுபடுத்தியுள்ளார்.

பெரும்பான்மையை சட்டமன்றத்தில்தான் நிரூபிக்க வேண்டும், ராஜ் பவனில் அல்ல என்ற எஸ்.ஆர். பொம்மை வழக்கின் உச்சநீதிமன்றத் தீர்ப்பையும் சுட்டிக்காட்டி, ஆளுநர் தனது கடமையை சரிவர செய்ய வேண்டும் என மறைமுகமாக வலியுறுத்தியுள்ளார். மக்கள் தீர்ப்புக்கு மரியாதை கிடைத்தே ஆக வேண்டும் என்பதை அவர் தனது ஒவ்வொரு வார்த்தையிலும் உணர்த்தியுள்ளார்.